DA KA JINGAIEI LA PYNIM

"DA KA JINGAIEI LA PYNIM"

Namar da ka jingaiei la pynim ïa phi, da ka jingngeit keiñ; kata ruh, ym na phi hi; ka long ka jingai U Blei: ym da ki jingleh keiñ, ba uno uno ruh un ym ïoh ban sngewsarong. ~ Ephesos 2:8‭-‬9.

|Mr. M.P Mawkon, Nongjri| 

|Dated Shillong, the 19th  Naitung  2023|

Ha kjat jong ka Diengphna, U Blei u la theh noh buk ia la ka jong ka JINGAIEI da ka JINGPYNIM. Ka jingbha kor tam jong U Blei ka paw ha ka jingshah shitom jong U Khrist haduh ban aiti ia la ka jingim ban pynim ia ngi wat la ngim dei hok ban ioh ruh. 

Naduh ba sdang jong ka Pyrthei, U Blei u la peit shaiñ sha ngi da ka jingieid bad u la dep pyrkhat lypa ruh ban ting khun ia ngi kum la ki jong hi. Lyngba ka jingdapbiang jong ka BUROM ka JINGAIEI Blei  jong u, kaba u la ai ei ha ngi ha uta U Ba-ieit (U JISU KHRIST) (Ephesos 1:6).

Da ka JINGAIEI jong U Blei la thied noh ia ka JINGPYNIM jong ngi da ka snam jong U JISU KHRIST. La sait khuid noh phar ia ki pop jong ngi bad la PYNKSAN hakhmat jong U Blei. Un iohi ba ngi long kiba khuid hakhmat jong u bad ba la sait lieh phar kum ka Ïor bad ban long kum ki briew ki bym don pop eiei shuh.

Wat la u long u khun ba tang marwei jong U Blei ha ka burom jong u, hynrei U Trai Jisu Khrist u la pynthylli  ia lade. U la wan hiar sha Pyrthei ha ka jinglongbriew tang kawei ka thong bad ka jingthmu kata BAN PYNIM IA KA PYRTHEI DA U. Da ka jingshah shitom halor ka Diengphna haduh ka jingiap ban aiti ia la ka jingim. Ha ka jinglong rit u la wan longbriew ba ngin ioh im ha kata ka Ri kaba dap da ka Burom jong U Blei. Kumba u la kular ba un leit khreh ia kata ka jaka ia ngi bad ban wan shaw ia ngi ynda u la dep khreh ia ka.

Dei tang da ka JINGAIEI ba la PYNIM ia ngi. Ha Jingshisha ngim donhok ban ioh ia kane ka JINGAIEI. Bad ngim lah da lei lei ban ioh ia ka JINGPYNIM da la ka bor ne da la ki kam ki jingleh jong ngi. Hynrei ha Lum Kalbari, ka Burom jong ka JINGAIEI U Blei ka la paw ha ngi kum ka JINGAI SNGEWBHA kaba KHUID bad kaba JANAI.