KA JINGHAPNOH KABA SHYRKHEI

 

🕊️KA JINGHAPNOH KABA SHYRKHEI🕊️

Ka jingsarong u briew ka pynpoh ïa u: hynrei uta uba rit ha ka mynsiem un ïoh ka burom. ~ Proberb 29:23.

|Mr. M.P Mawkon, Nongjri|

|Dated Shillong, 29th Naitung 2023|

Ka Jingsarong jong u Kaiñ ka pynhiar arsut bad u hap iaid sakma lamwir namar la dkhat lut noh baroh ia ka jingieid jong U Blei. Ha ka jaka ban kren da ka jingsngewrit bad kaba pynhapoh ia lade ha U Blei, hynrei ngi iohi ba u Kaiñ u la kren pyn at shadem haba u Blei u la kren pyrshah ia u bad kata ka dei kaba la pynhiar arsut ia u.

Ka jingiathuhkhaba jong U Kaiñ bad u Abel ka dei ka jinghikai jong ka jingim kaba kynja mynsiem. Haba ki ia wan rah ia la ki jingainguh ha khmat U TRAI, la iathuh da ka Kitab Jenesis ba U Blei ym tang ba u pdiang ia ka jingainguh jong U Abel hynrei u la burom ruh ia ka. Katba ia u Kaiñ nalor ba u Blei um burom la iathuh ba u la kyntait ruh ia kita ki jingkñia jingainguh jong u. Kam pher haduh katno phi lah ban wan rah ia  ki jingai sha U Blei, hynrei U Blei un ym sngewbha da lei lei ruh ia kita ki jingai tad haduh ba phin sngewthuh ban ai nyngkong ia la ka dohnud jong phi. Aiu U Blei u kwah ka long ia Phi!

Ka Jingsarong jong u Kaiñ ka paw ha ki jinglong bad ki jingleh jong u - ka jingbishni, ka jingdom, ka jingkyntait ban kylla kaba mut,  ka jingpyniap ia la u para, bad khamtam eh ka jingthok jingshukor wat ban len na u Blei ruh.

Ka Jingsarong ka pynpoh bad pynhiar arsut ia u khunbynriew. Bad kane ka Jingsarong ka ioh ban pyniasniew bad pyniashun para briew ruh. Bad kane ka ioh lad ban khñiot ia ka  jingiadei ha ka jingim briew.

Ka Jingsarong kam ju thait ban pynkhraw ia ka malade bad ia la ka jong ka jinglah. Kam ju thait ban pynpaw ia la ka jingkhraw da ka jingsngewmeng. Ka Jingsarong ka pyni bor ruh wat ban ia shoh ia dat ne haduh ban jia kaei kaei kaba sngewsih ruh. Ka jingsngewmeng bad jingsngew tang ia ka malade ki ia trei lem bad ka Jingsarong. Bad kane kan ialam haduh ban mane blei ia ka malade.

Kum u Kaiñ, hato kane ka Jingsarong ka ioh ban bsut ha ka dohnud jong phi? Hato kane ka Jingsarong ka ioh ban bsut ha ka jingim jong phi? Hato ka ioh ban snoh ha ka rukom kren rukom khana jong phi? Hato kane ka Jingsarong ka ioh ban kjap noh ia ka jingiadei bad ka jingiajan na ki briew kiba phi ieid? To phin pynrit ïa lade namar kata hapoh ka kti bakhrawbor ka jong U Blei, ba un ïoh pynkhraw ïa phi ha ka Ïa ba bit shuwa ba ka jingsarong kan pynpoh ïa phi (1 Petros 5:6; Proberb 29:23).