UTA UBA ÏAINEH HADUH KA BA KUT

 🕊️UTA UBA ÏAINEH HADUH KA BA KUT🕊️

Hynrei, jar uba da ïaineh haduh ka bakut, uta keiñ u ban ïohlait im. ~ Mathaïos 24:13.

|Mr. M.P Mawkon, Nongjri|

    |Dated Shillong, 28th Naitung 2023|

Haba ngi phai ban peit ia ka Pyrthei bad ki jinglong jingman ha ka, ngi iohi ba ki dak ki shin jong ka jingwan arsien jong U Jisu ka la hajan. Bad haba ngi ia kren kumta, ka shong ha ngi la ngin shah ba kine ki eriong erlangthari kin ioh kynting noh ia ngi ne ngin skhem ha uta u angkor jong ka jingim jong ngi U Jisu bad ha ka Ktien jong u.

U Blei un ym iehnoh khunswet ia ngi khlem peit khlem khmih shuh ha kita ki sngi jong ka jingdum ban sa wan. U Daniel u lah dep iathuhlypa ia ka jinglehdonbor jong uta u Khrist lamler bad un ïeng ïaleh ruh wat ïa uta U Syiem ki syiem (Daniel 8:25). Un leh donbor halor ki Nongsynshar jong kane ka Pyrthei ban pynlong kawei ka bor synshar, kawei ka ioh ka kot, kawei ka niam, bad un pynshitom beiñ ia kat uba kyntait ban leh kumta.

U Trai Jisu u la dep iathuhlypa ia kita ki sngi jingjynjar bah ne kordit bah ka ban jia long ia kaba ym pat ju long naduh myndanglong kane ka  pyrthei haduh mynta, em, lymne kan ym long shuh ruh. Te lymda pyndkut noh ïa kita ki sngi, kan ym lait im kawei ka doh ruh hynrei, na ka bynta kiba la jied, yn pyndkut noh ïa kita ki sngi. (Mathaios 24:21-22).

Bad haba ki dak ki shin jong kata ka sngi ka jingwan arsien jing u ka la ha jan, ka Pyrthei kan dap da kiei kiei ki jingsheptieng, bad ki briew kin ia mareh lamwir shane bad shatai, ban wad ia ki jingstad ki jingtip da ka jingkyrmen ban pynbha ia kane ka jinglong jingman jong kane ka Pyrthei ha kine ki sngi.

Ia ngi kum ki Khristan wat ai ba ka jingsheptieng bad jingkulmar jingmut kin ioh ban bsut ha ngi haba ngi iohi ia kine kiei kiei kiba jia sawdong jong ngi. Hynrei to ai ngin iaineh skhem ha U Trai jong ngi U Jisu Khrist lem bad ka Ktien jong ka jingshisha jong u. To ai ba yn buhrieh noh lem ia ka jingim jong ngi ha U Khrist khnang ba ngin ym long kiba khih phaloh da kine kiei kiei baroh. To ngin long kiba peitngor bad kiba ïit bniah janai bha haba ngi iohi bad iohsngew ia ki jingjia sawdong jong ngi. To wat ai ba ngin shu long tang ki briew kiba shu iohsngew ia Ka Ktien U Blei hynrei kiba leh ruh ia ka - wat la ngi im ha kane ka pateng bynriew kaba kyntait ban ithuh ia u. Hynrei to ai ngin long kiba iaineh skhem haduh kaba kut bad la U Trai bad Nongpynim jong ngi - U JISU KHRIST khnang ba ngin ioh lait im.