KA JINGDUWAI U BRIEW UBA POP DA KA JINGNGEIT.

U la ong te, “Ko Jisu, to kynmaw ïa nga ynda me poi ha ka hima jong me.” ~ Loukas 23:42.

|Mr. M.P Mawkon, Nongjri|

|Dated: Shillong the 5  tarik Naitung 2024/

Baroh baroh ngi tip bha ia kane ka jingduwai bad jingkyrpad jong uwei na ki arngut ki dakaid ia U Trai Jisu halor ka diengphna ha Lum Kalbari. Ka Jingduwai da ka jingsngewrit kaba sngewthuh ia lade ba u long u nongpop uba khraw tam. U sngewthuh ba um don hok ban paw hakhmat jong u Khun jong U Blei. Hynrei u shu kyrpad "BAN SHU KYNMAW IA U". U sngewthuh ba lada U Blei u KYNMAW ka long ka burom kaba khraw eh ba ym don mano mano ba lah ban khang wat u soitan ruh.

Ha ka Bible haba ong U Blei u kynmaw iano iano ka mut U Blei u pyrkhat sngewieid shaphang jong ki, ka jingiakynduh jingeh jong ki ne u sngap ia ka Jingduwai jong ki. Ym dei ba U Blei un klet noh hynrei U jied ban shahshkor bad ban ialeh bad ïasaid na bynta jong ki.

Haba U Blei u kynmaw ia ngi, ka iathuh kumne kat kum ka Ktien U Blei:-

1. U shahshkor ia ki jingiam bad ki jingduwai jong ngi (Eksodos 2:24, Salm 105:44-45).

2. U pynpaw ia la ka jong ka jingaiei bad jingisynei (Jenesis 8:1, Loukas 1:54-55).

3. U pyllait na ki jingma ki jingmynsaw bad kino kino ki jingeh (Salm 106:4-5, Eksodos 3:7-8).

4. U pyndep ia la ka jong ka jingkular bad ka jingiateh ne ka jutang (Jenesis 19:29, Lebitikos 26:42-45).

5. U pynthymmai bad pynbha pat ia ngi (Salm 105:4-5, Isaïah 49:14-16).

Ka jingkynmaw ka jong U Blei ka dei ka JINGKYRKHU, ka dak jong ka JINGIEID bad ka jingbha sbun (love and faithfulness). Ka long ka burom ban tip bad pyrkhat ieid ba U Blei u kynmaw ia ngi bad ia ka Jingduwai jong ngi. Ym tang katta hynrei u ïasaid bad ïeng na bynta jong ngi.