KA JINGLAITLUID

 

“KA JINGLAITLUID”

“Namar baroh ki la leh pop bad ki la duh lehnohei ïa ka Burom ka jong U BLEI: Ïa kiba la pynksan ei da ka jingaiei jong u keiñ da kata ka jingsiewspah kaba ha U KHRIST JISU" – ROM 3:23-24.

Ka JINGLAITLUID (Freedom) ka dei kawei na ka jinglong kiba tang kita kiba mad ia ka JINGLAITLUID NA KA JINGSHAH TEH MRAW ki sngewthuh kham bha ia ka.  Ka Ri India ka dei ka Ri kaba la ioh ia ka JINGLAITLUID na kane ka JINGLONG MRAW ha u snem 1947 na ka jingsynshar ki British. Kumta ngi ju rakhe PYNDONBUROM ia ka sngi JINGLAITLUID ne ka INDEPENDENCE DAY man la ka snem ha ka 15 tarik U Nailar. 

Ha ka JINGNGEIT kum KI KHRISTAN ruh, Ngi tip bha ba U KHUNBYNRIEW baroh u dei uba im ha ka jingim jong ka Jingshah teh mraw ha u Soitan bad ka Pop. Hynrei da ka jingshah iap jong U JISU KHRIST, U Khun jong U BLEI ha ka Diengphna la PYLLAITLUID noh ia ngi na ki jingshah teh shah khum baroh ha ka POP bad baroh ngi la long kiba laitluid. Namar ka KTIEN U BLEI ka ong kumne, "Namar baroh ki la leh pop bad ki la duh lehnohei ïa ka Burom ka jong U BLEI: Ïa kiba la pynksan ei da ka jingaiei jong u keiñ da kata ka jingsiewspah kaba ha U KHRIST JISU" (ROM 3:23-24). Namarkata, ngi ruh haba la PYLLAITLUID ia ngi na kane ka JINGLONGMRAW dei ban sngewthuh bha ia ka dor jong ka JINGLAITLUID (FREEDOM).

Kumta kum kiba la ioh ia ka JINGLAITLUID, to ngin bat skhem ia kane ha lade hi bad ngim dei ban klet ia ka haba wan ki jingpyntieng jong kane ka PYRTHEI bad U SOITAN. Bad kum kiba sngewthuh shisha ia kane ka dor ka JINGLAITLUID kaba la siew da ka dor ba kordor bad ba kynja Blei da KA SNAM U KHUN U BLEI bad da ka U LA SIEWSPAH ia kata ka KUNA kaba ngi la leh. U Nongrwai shem mynsiem u don ban rwai kumne, "Ia ki saikhum jong ka Raibi, Me la bthat da jingieit Blei; Napoh ki liewlep ba ijli, Me la khring da jingisnei. Ah Trai Jisu, Ia kane ngam lah ban klet." Kata ka dei ka jingsngewthuh bashisha ia ka dor ka JINGLAITLUID haba la lait na ka Jingshah teh mraw ha ka pop. Shisha ia kane ngim lah ne dei ban klet.

Haba ngi la sngewthuh ia ka dor jong ka, kumta to ngin phla ia la ka jong ka jingbymlong  eiei kum ki briew da ka mynsiem ka JINGSNGEWRIT bad kaba pyndem rit ia lade ha U Blei bad ban thrang ruh  ia ka ban leh ia ka mon ka jong U. Une  u juh u Nongrwai shem mynsiem u la phla da ka jingsngewrit shisha kumne, "Nga don aiu te ha Pyrthei, Ba nga don hok ban dawa? Ïa nga la thied noh da ka dor Blei, Kata long ka SPAH jong Nga; Ka Mon jong Me, Tang kata Nga kwah ban leh." 

Kaba khatduh kaba donkam tam ka long ban shim ia ka sien jam ban rai bad kut jingmut BAN SHAKRI IA U BLEI KHLEM DA KYRTIANG DIEN SHUH LANO LANO RUH kumba ong utei u juh u Nongrwai shem mynsiem, " Trai Kynrad, ngan shakri ia Me, Katba Jingim ka dang sah; Kano kano ba me ong te, Nga kloi ban leh ngam kyrngah. Kyrteng jong Me, Ban ialap nga sngewbha eh".

|Da U Mr. M.P Mawkon, Nongjri|